പുസ്തകങ്ങള് വായിക്കുന്നത് എന്തിനാണ് എന്ന് ചോദിക്കുന്നവരാണ് ഏറേപ്പെരും.ഇവര്ക്ക് ഇന്നുവരെയും ഒരു മറുപടിയും കൊടുത്തിട്ടില്ല, എന്നാല് ഈ ചോദ്യങ്ങള്,പലപ്പോഴും എന്തിനാണ് പുസ്തകങ്ങള് വായിക്കുന്നതെന്ന് അലോചനയില് കുരിക്കിയിട്ടുണ്ട്.ഒരിക്കലും ഉത്തരം കിട്ടാത്ത ചോദ്യമായി അത് ഇപ്പോഴും എനിക്ക് ചുറ്റും കറങ്ങുന്നുണ്ട്.പല വട്ടം ആലോചിച്ചിട്ടുണ്ട് എന്തിനാണ് വായിക്കുന്നത്,എന്താണ് വായന കൊണ്ടുള്ള പ്രയോജനം,അറിയില്ല,പക്ഷേ ദിവസവും പത്ത് പേജ് വായിച്ച് കഴിയുമ്പോള് ഉള്ളില് നിറയുന്ന ഒരു ശാന്തതയുണ്ട്(ചിലപുസ്തകങ്ങള് വായിക്കുമ്പോള് അസ്വസ്ഥമാകുന്നമുണ്ട് കേട്ടോ)ആ ശാന്തത ആയിരിക്കാം അതിനുള്ള ഉത്തരം.പക്ഷേ അത് മറ്റോരാളോട് പറഞ്ഞു ഫലിപ്പിക്കാന് കഴിയില്ലലോ. വായിച്ചു തുടങ്ങിയ കാലം മുതല് ഇന്നു വരെയും വാങ്ങിച്ച പുസ്തകങ്ങള് വായിച്ച് തീര്ത്തിട്ടുണ്ടോ എന്ന ഒരു സുഹ്യത്തിന്റെ ചോദ്യത്തിന് എന്റെ ഉത്തരം "ഇല്ല" എന്നു തന്നെ യായിരുന്നു, അതിന് സുഹ്യത്തിന്റെ പ്രതികരണം "നിങ്ങള് ചുമ്മാ ജാഡക്ക് പുസ്തകം വാങ്ങി കൂട്ടുന്നതല്ലേ, വായിക്കാനല്ലലോ" എന്നായിരുന്നു.
ം വാങ്ങുന്ന എല്ലാ പുസ്തകങ്ങളും വായിക്കാനുള്ള ആഗ്രഹത്തോടെ തന്നെയാണ് വാങ്ങുന്നതു ,പക്ഷേ ജീവിതത്തിന്റെ ഒരോ ഘട്ടവും കടന്ന് മുന്നോട്ട് പോകുന്തൊറും ജീവിതത്തില് അനുവദിക്കപ്പെട്ട സമയം വല്ലാതെ കുറഞ്ഞു പോകുന്നതായി തോന്നുന്നു, കുടുബജീവിതത്തിനും, ഔദ്യോഗിക ജീവിതത്തിനും വേണ്ടി ആ സമയത്തിന്റെ നല്ലൊരു ഭാഗവും മാറ്റി വയ്ക്കുമ്പോള്,വ്യക്തി എന്ന നിലയിലുള്ള ജീവിതവും അതിലെ സ്വകാര്യ ആനന്ദമായ വായനയും മൂന്നാം സ്ഥാനത്തെക്ക് പിന്തള്ളപ്പെടുന്നു.പുസ്തക ശാലകളില് പലപ്പോഴും പോകുന്നത് ചില പ്രത്യേക പുസ്കങ്ങളെ തേടിയായിരിക്കും,വായിച്ച ആനുകാലികങ്ങളില്, സാമൂഹിക മാദ്ധ്യമങ്ങളില് ഒക്കെ നിന്ന് ലഭിക്കുന്ന പുസ്തക വിവരങ്ങള്,ചില വായനാനുഭവങ്ങള്, ആ പുസ്തകങ്ങളെ തേടി ചെല്ലുവാന് എന്നിലെ വായനക്കാരനെ പ്രചോദിപ്പിക്കുന്നു.എന്നാല് ആ പുസ്തകം തിരഞ്ഞെടുത്ത് കഴിയുമ്പോൾ പുസ്തകശാലയിലെ നിറഞ്ഞ ഷെല്ഫുകളില് നിരന്നിരിക്കുന്ന പല പുസ്തകങ്ങളും മനസ്സിനെ പ്രലോഭിപ്പിക്കുകയും, ആ പ്രലോഭനം നിയന്ത്രിക്കാന് കഴിയാതെ അവയിൽ ചിലത് കൂടി വാങ്ങി വീട്ടില് എത്തുമ്പോള്,ഒരു പക്ഷേ ആദ്യം വായനക്ക് എടുക്കുന്നത് ആദ്യം തേടിപ്പോയ പുസ്തകം ആയിരിക്കില്ല അതോടൊപ്പം എടുക്കുക മറ്റു പുസ്തകങ്ങളിൽ ഒന്നായിരിക്കും, പുസ്തകമേളകളിലും ഇതുതന്നെയാണ് ഒരോ വായനക്കാരനിലും സംഭവിക്കുന്നത് , കളിപ്പാട്ട കടക്ക് ഉള്ളില് പെട്ടു പോയ ഒരു കുട്ടിയുടെ കൺഫ്യൂഷൻ തന്നെ ഒരു വായനക്കാരനെയും പുസ്തകമേളകൾ അനുഭവിപ്പിക്കാറുണ്ട്.
പലപ്പോഴും കിട്ടിയ അറിവിന്റെ ആവേശത്തിൽ വായിക്കാൻ എടുക്കുന്ന പുസ്തകങ്ങള് പലതും ഒരു പക്ഷേ പത്ത് പേജില് കൂടുതല് കടന്നുപോകാന് കഴിയാതെ തിരികെ വെയ്ക്കെണ്ടി വരുകയും,പതിയെ വായന മറ്റു പുസ്തകങ്ങളിലെക്ക് മാറുകയും ചെയ്യുന്നു, ആ പുസ്തകത്തിന്റെ ആദ്യ പത്ത് പേജുകളുടെ വായനയിലൂടെ നമ്മളില് അനുഭവപ്പെടുന്ന മടുപ്പിൽ ചിലപ്പോഴൊക്കെ ആ പുസ്തകത്തോടുള്ള മടുപ്പായി മാറുന്നു,പിന്നീട് ചിലപ്പോള് ആ പുസ്തകം ഒരിക്കവും വായിക്കാത്ത പുസ്തകങ്ങളുടെ ഇടങ്ങളിലെക്ക് സ്ഥാനം പിടിക്കുന്നു .
കോളേജ് കാലത്ത് ഗൗരവമായ വായന ആരംഭിക്കുകയും പിന്നീട് ജോലിയുടെ ആസുര തിരക്കിലേക്ക് , ആ കയത്തിലേക്ക് പെട്ടു പോയപ്പോൾ വായന അലസമായി ആയി മാറിയതും കുറച്ചൊന്നുമല്ല മനസ്സിലെ അസ്വസ്ഥമാക്കിയത്. എന്നാല് കഴിഞ്ഞ രണ്ട് മൂന്ന് വർഷങ്ങളിൽ ആ വായനയെ തിരികെ പിടിക്കാൻ കഴിഞ്ഞു എന്നത് ജീവിതത്തിന്റെ തന്നെ വലിയ ആശ്വാസമായി മാറുന്ന.ആ ആസുരമായ കാലത്തും പുസ്തകങ്ങൾ വാങ്ങലും, ലൈബ്രറിയിൽ നിന്ന് എടുക്കലും ഒരിക്കലും മുടക്കിയില്ല എന്നത് ,എന്നെങ്കിലും ആ പഴയ വായനയെ തിരികെ പിടിക്കാമെന്ന് ആത്മവിശ്വാസമായിരുന്നു. കെട്ട കാലങ്ങളിൽ ആ ദുരിത ജീവിതങ്ങളില് നിന്ന് മനസ്സിനെ പുറത്തു കൊണ്ടുവരാനായി സഹായിച്ച ചില പുസ്തകങ്ങൾ ഉണ്ട്, അത് ഒരിക്കലും മറക്കാൻ കഴിയാത്ത വായന കാലമായിരുന്നു,ആ പുസ്തകങ്ങളുടെ വായനയും എഴുത്തുകാരും ഒരിക്കലും നമ്മുടെ മറവിയിലേക്ക് പോകില്ല, അവര് നല്കിയ തെളിച്ചങ്ങള് ആ ഇരുണ്ട കാലത്ത് കിട്ടിയ മൃതസഞ്ജീവനി തന്നെയായിരുന്ന എന്ന് തന്നെ പറയാം.വായന ഇത്തരത്തിലോക്കെ മുന്നോട്ട് പോകുമ്പോഴും ആ പഴയ ചോദ്യം ഇപ്പോഴും എനിക്ക് ചുറ്റും കറങ്ങി നിൽക്കുന്ന, എന്തിനാണ് നിങ്ങൾ പുസ്തകങ്ങൾ വായിക്കുന്നത് . നമ്മള് വായിക്കുന്ന ഓരോ പുസ്തകങ്ങള്, നമ്മളെ എത്തിപ്പെടാത്ത എത്രയോ ലോകങ്ങളിലുടെ നമ്മളെ കൊണ്ടു പോകുന്നു,നമ്മള് കാണാത്ത ദേശങ്ങൾ, നമ്മൾ കാണാത്ത കടലുകൾ, നമ്മൾ കാണാത്ത മരുഭൂമികൾ,നമ്മള് കാണാത്ത കാടുകൾ, അവയൊക്കെ നമ്മുടെ വായനാ മുറിയിലെ കസേരയുടെയും മേശയുടെയും അടുത്തേക്ക് വന്നു കൊണ്ടിരുന്ന ആ പുസ്തകങ്ങളുടെ വായനയിലൂടെ, എഴുത്തുകാരനിലൂടെ, ആ വരികളിലൂടെ, ആ വാക്കുകളിലൂടെ, അതോക്കെ നമ്മള് അനുഭവിക്കുന്നു. ഓരോ എഴുത്തുകാരന്റെയും, അനുഭവങ്ങള് കഥകളായോ, കവിതകളായോ, നോവലുകളായോ, യാത്രഴുത്തുകളായോ, മാറുമ്പോൾ നമ്മൾ എത്രയോ മനുഷ്യരുടെ അനുഭവങ്ങളിലൂടെയാണ് കടന്നു പോകുന്നത് . ഇങ്ങനെ ഓരോ പുസ്തകങ്ങൾ വായിച്ചു തീരുമ്പോഴും ആ അനുഭവങ്ങളിലൂടെ നമ്മൾ കൂടുതൽ കൂടുതൽ നല്ല മനുഷ്യരായ മാറും എന്ന വിശ്വാസം മാത്രമാണ് പിന്നെയും പിന്നെയും പുസ്തകങ്ങള് വായിച്ച് വായിച്ച് ജീവിക്കുവാന് നമ്മളെ പ്രചോദിപ്പിക്കുന്നത് .അങ്ങനെ വായിച്ച് വായിച്ച് നല്ല മനുഷ്യരായി തീരുവാൻ ഇനിയും ഇനിയും പുസ്തകങ്ങൾ വായിച്ച് തീർക്കുവാൻ,ഇനിയും ഇനിയും പുസ്തകങ്ങൾ വാങ്ങി കൂട്ടുവാൻ ഒരോ രാത്രികളും കടന്ന് വരുന്ന ഒരോ പ്രഭാതത്തിലും വായനക്കരന് സാധിക്കട്ടെ എന്ന് മാത്രമാണ് ഓരോ ദിവസവും അണയുമ്പോഴും പ്രത്യാശിക്കുന്നത്. ഇതാണ് ആ ചങ്ങാതി ചോദിച്ച ചോദ്യത്തിനുള്ള ഉത്തരം എന്ന് ഈ വായനാ ദിനത്തില് ഞാന് വിശ്വസിക്കുന്നു.
